၁၇၄၉ ခုနှစ်၊ မေလ (၁၇) ရက် တွင်မွေးဖွားခဲ့သော အင်္ဂလိပ်လူမျိုး ခွဲစိတ်ဆရာဝန် အက်ဒ်ဝပ်ဂျန်နာ သည် ကျောက်ရောဂါကာကွယ်ဆေးကို အောင်မြင်စွာ စမ်းသပ်ရှာဖွေနိုင်ခဲ့ပါသည်။ ကြောက်မက်ဖွယ်ကောင်းသော ကျောက်ရောဂါသည် ဗေရီယိုးလားဗိုင်းရပ်စ်ပိုးကြောင့် ဖြစ်ပွားခြင်းဖြစ်ပြီး ​လူ (၁၀၀)လျှင် အယောက် (၃၀) နှုန်း အထိ လူ့အသက်သေဆုံးနိုင်ချေရှိသော ရောဂါတစ်မျိုးဖြစ်ပါသည်။ ဂျန်နာသည် နွားကျောက်​ရောဂါ (cowpox) ဖြစ်ပြီး​သောသူများတွင် ​ကျောက်​ရောဂါ (smallpox) လုံးဝမကူးစက်နိုင်​ကြောင်းသတိပြုမိခဲ့ပြီး ယခုခေတ်လေ့လာမှုများအရလည်း ကျောက်ရောဂါဗိုင်းရပ်စ်ပိုး နှင့် နွားကျောက်ရောဂါဗိုင်းရပ်စ်ပိုးတို့သည် နီးစပ်စွာတူညီကြောင်းတွေ့ရှိရပါသည်။ ၁၇၉၆ ခုနှစ်၊ မေလတွင် ဆာရာနင်းမ်စ် အမည်ရှိ နွားခြံအလုပ်သမ ငယ်လေး တစ်ဦး၏ လက်တွင် နွားကျောက် ရောဂါကူးစက်ခံရ၍အနာများဖြစ်ပေါ်နေသည်ကို ဂျန်နာ မှ တွေ့ရှိခဲ့ပြီးနောက် ယင်းအနာမှ ပြည်ရည်ကိုယူ၍ ကျောက်ရောဂါတစ်ခါမျှမဖြစ်ဖူးသေးသော အသက်(၈)နှစ်အရွယ် ကလေးငယ် ဂျိမ်းစ်ဖစ် အမည်ရှိ ယောကျ်ားလေးတစ်ဦး၏ ခန္ဓာကိုယ်ထဲသို့ ထိုးပေးခဲ့ပါသည်။ သုံးလခန့်ကြာမြင့်ပြီးနောက် ထိုကလေးငယ်၏ ခန္ဓာကိုယ်ထဲသို့ ကျောက်ရောဂါဖြစ်ပွားနေသောသူတစ်ဦး၏ အနာပြည်ကို ဂျန်နာ မှ ထပ်မံထိုးပေးခဲ့ပါသည်။ မယုံကြည်နိုင်လောက်အောင် အံ့သြဖွယ်တွေ့ရှိရသည်မှာ ထိုကလေးငယ်ကို သေစေနိုင်သည့် ကျောက်ရောဂါမှ လုံးဝကာကွယ်ပေးနိုင်ခဲ့ခြင်းပင်ဖြစ်သည်။ ဂျန်နာ ၏ စမ်းသပ်ဖော်ထုတ်နိုင်မှုကြောင့် ကျောက်ရောဂါဖြင့် သေဆုံးမှုနှုန်းအား တမဟုတ်ချင်း လျှော့ချနိုင်ခဲ့ပြီး သူ၏ဆေးပညာအမွေအနှစ်အား လက်ဆင့်ကမ်းစေခဲ့ပြီး တစ်ကမ္ဘာလုံးဆိုင်ရာကာကွယ်ဆေး ထိုးနှံခြင်းအစီအစဉ်များဖြင့် ကျောက်ရောဂါဖြစ်စေတတ်သော ဗိုင်းရပ်စ်ပိုးကို ၁၉၇၇ခုနှစ်တွင် ကမ္ဘာပေါ်မှ အပြီးတိုင်အမြစ်ဖြတ်ဖယ်ရှားနိုင်ခဲ့ကြပါသည်။ ၁၉၈၀ ခုနှစ်၊ မေလ (၈)ရက်နေ့တွင် ကျင်းပပြုလုပ်ခဲ့သော ကမ္ဘာ့ကျန်းမာရေးညီလာခံမှ ကမ္ဘာပေါ်တွင် ကျောက်ရောဂါ အပြီးတိုင် ကင်းစင်သွားပြီဖြစ်ကြောင်း ကြေငြာခဲ့ပါသည်။